A Dirección Xeral de Formación Profesional vén de publicar a Resolución do 31 de marzo de 2025 pola que se ditan instrucións para a acreditación das competencias dixitais do alumnado que cursa ensinanzas de formación profesional, ensinanzas profesionais de artes plásticas e deseño de réxime especial, e ensinanzas de educación secundaria e bacharelato para persoas adultas na Comunidade Autónoma de Galicia no curso 2024-2025.
Pódese acceder a esta Resolución dende o enlace seguinte:
https://www.edu.xunta.gal/fp/webfm_send/11131
Segundo dita Resolución, pódense acreditar dous posibles niveis de competencia dixital dentro do Marco galego de competencias dixitais:
- Nivel iniciación
- Nivel intermedio
A certificación que acredite un nivel completo de competencias dixitais estará dispoñible na “Carpeta cidadá” da sede electrónica da Xunta de Galicia de cada alumno/a. Igualmente a recibirá a través da aplicación Abalar.
Por outra banda, a acreditación terá unha validez de cinco anos e hai varias posibilidades de obtela nalgún dos dous niveis mencionados, tal e como se especifica de seguido.
ACREDITACIÓN DE OFICIO POR OBTER UN TÍTULO DE FORMACIÓN PROFESIONAL
NIVEL INICIACIÓN: acreditará o nivel de iniciación en competencias dixitais o seguinte alumnado:
- Aquel que obteña o título de FP Básica en calquera perfil profesional no curso 2024-2025
NIVEL INTERMEDIO COMPLETO: acreditará o nivel intermedio completo en competencias dixitais o seguinte alumnado:
- Aquel que obteña no curso 2024-2025 o título de técnico ou técnica (título de ciclo de grao medio) en “Sistemas microinformáticos e redes”, en “Instalacións de telecomunicacións” ou en “Instalacións eléctricas e automáticas”.
- Aquel que obteña no curso 2024-2025 o título de técnico superior ou técnica superior (título de grao superior) en calquera perfil profesional.
- Aquel que obteña no curso 2024-2025 o título de máster de formación profesional (curso de especialización de grao superior), sempre e cando acredite dispor dun título de técnico superior ou técnica superior.
NIVEL INTERMEDIO PARCIAL: acreditará o nivel intermedio parcial, non completo, en competencias dixitais o seguinte alumnado:
- Aquel que obteña no curso 2024-2025 o título de técnico ou técnica (título de ciclo de grao medio) diferente a “Sistemas microinformáticos e redes”, “Instalacións de telecomunicacións” e “Instalacións eléctricas e automáticas”.
ACREDITACIÓN DO NIVEL INTERMEDIO COMPLETO POR PROBA ESPECÍFICA
Pode presentarse a unha proba específica de nivel intermedio aquel alumnado matriculado durante o curso 2024-2025 no segundo curso dun ciclo formativo de FP Básica. A proba será realizada no mes de maio no propio centro.
Dende o seguinte enlace pódese realizar unha proba de exemplo de proba para acreditar o nivel intermedio completo: https://certificacion-competenciasdixitais.xunta.gal/gl
ACREDITACIÓN DO NIVEL INTERMEDIO COMPLETO POR PROBA ESPECÍFICA E SIMULTANEAMENTE POR OBTER UNHA TITULACIÓN
Poderá acreditar o nivel intermedio o alumnado que supere unha proba exclusiva da área de dominio 4 e simultaneamente obteña durante o curso 2024-2025 un título de técnico ou técnica (título de ciclo de grao medio) diferente a “Sistemas microinformáticos e redes”, “Instalacións de telecomunicacións” e “Instalacións eléctricas e automáticas”. A proba será realizada no mes de maio no propio centro.
INSCRICIÓN NA PROBA
O alumnado interesado en participar nas probas indicadas anteriormente (de nivel intermedio completo ou a proba parcial da área de dominio 4 do nivel intermedio), entregará cuberto na oficina o documento de solicitude (Anexo I) dende o día 7 de abril ata o 28 de abril de 2025 ás 23:59 horas. No caso de alumnado menor de idade, deberá contar coa autorización das persoas proxenitoras ou das persoas titoras legais.
As probas realizaranse no centro no mes de maio e nas datas asignadas dende a Dirección Xeral de Formación Profesional.